RSXM-nin nümayəndə heyəti Gürcüstanda səfərdə olub

23-25 oktyabr 2023-cü il tarixlərində Gürcüstan Respublikasının paytaxtı Tbilisi şəhərində ABŞ-ın Enerji Departamentinin Milli Nüvə Təhlükəsizliyi İdarəsinin dəstəyi ilə Ukrayna Elm və Texnologiya Mərkəzinin təşkilatçılığı ilə “Qafqazda və Mərkəzi Asiyada seysmik şəbəkənin genişləndirilməsi” layihəsi üzrə tərəfdaş ölkələrin nümayəndə heyətlərinin iştirakı ilə toplantı keçirilib. Toplantıda Azərbaycan, ABŞ, Qazaxıstan, Qırğızıstan, Gürcüstan, Tacikistan və başqa ölkələrdən nümayəndə heyətləri iştirak ediblər.

İclasda Azərbaycanı AMEA nəzdində Respublika Seysmoloji Xidmət Mərkəzinin baş direktoru, AMEA-nın müxbir üzvü, professor Qurban Yetirmişlinin rəhbərliyi ilə RSXM-nin əməkdaşlarından ibarət nümayəndə heyəti təmsil edib. RSXM-nin Zəlzələ ocaqlarının dinamikası şöbəsinin müdiri, geologiya-mineralogiya üzrə fəlsəfə doktoru, dosent Səbinə Kazımova “Qafqazda və Mərkəzi Asiyada seysmik şəbəkənin genişləndirilməsi” layihəsi çərçivəsində Azərbaycanda görülmüş işlər haqqında çıxış edib. Tərəfdaş ölkələr arasında aparılan müzakirələrdən sonra layihənin müddətinin bir il uzadılması razılaşdırılıb.

Xatırladaq ki, “Qafqazda və Mərkəzi Asiyada seysmik şəbəkənin genişləndirilməsi” layihəsi çərçivəsində Azərbaycan ərazisində 22 yeni seysmik stansiyalar quraşdırılıb.