RSXM-də tədbir keçirilib

Noyabrın 27-də AMEA nəzdində Respublika Seysmoloji Xidmət Mərkəzində iclas keçirilib. İclasda RSXM-nin "Makroseysmik tədqiqatlar" şöbəsinin müdiri, geologiya-mineralogiya üzrə fəlsəfə doktoru, dosent Etibar Qaravəliyevin 50 illik yubileyi qeyd olunub.

AMEA  nəzdində RSXM-nin  baş direktoru, AMEA-nın müxbir üzvü, professor Qurban Yetirmişli bildirib ki, Etibar Qaravəliyev uzun illərdir ki, mərkəzdə çalışır. Etibar Qaravəliyevin həmişə ona göstərilən etimadı yüksək səviyyədə doğrultduğunu və kollektiv arasında böyük hörmət qazandığını bildirən baş direktor onun həmçinin mərkəzin Həmkarlar Təşkilatının sədri olduğunu qeyd edib. Onun sözlərinə görə, Etibar Qaravəliyev HT sədri kimi də kollektivin etimadını qazanıb.

Daha sonra baş direktor Qurban Yetirmişli 50 illik yubileyi münasibəti ilə AMEA-nın Azad Həmkarlar Təşkilatının və RSXM-nin Fəxri Fərmanlarını, eləcə də xatirə hədiyyəsini yubilyara təqdim edib.   

Əmək fəaliyyətinə başladığı gündən mərkəzdə çalışdığını bildirən Etibar Qaravəliyev bu gün RSXM-nin fəaliyyətinin yüksək səviyyədə olduğunu qeyd edib.  Etibar Qaravəliyev həmçinin mərkəzdə gənclərin fəaliyyəti üçün geniş imkanların olduğunu qeyd edərək, gəncləri elmi tədqiqatların aparılması sahəsində daha aktiv olmağa çağırıb.

Sonda göstərilən diqqətə görə yubilyar RSXM rəhbərliyinə və kollektivə təşəkkür edib.