RSXM-də “AHİK 30 - tarixə baxış” adlı tədbir keçirilib

AMEA nəzdində Respublika Seysmoloji Xidmət Mərkəzində mərkəzin Həmkarlar Təşkilatının təşkilatçılığı ilə Azərbaycan Həmkarlar İttifaqı Konfederasiyasının 30 illik yubileyinə həsr olunmuş “AHİK 30 - tarixə baxış” mövzusunda konfrans keçirilib. Konfransda çıxış edən AMEA nəzdində RSXM-nin Həmkarlar Təşkilatının sədri,  geologiya-mineralogiya üzrə fəlsəfə doktoru, dosent Etibar Qaravəliyev Azərbaycan Həmkarlar İttifaqı Konfederasiyasının yaradılmasının tarixi, əhəmiyyəti və əsas funksiyaları haqqında iştirakçıları məlumatlandırıb. 

AMEA nəzdində RSXM-nin Həmkarlar Təşkilatının AMEA-nın Azad Həmkarlar İttifaqının tərkibində fəaliyyət göstərdiyini qeyd edən Etibar Qaravəliyev işçilərin sosial problemlərinin həlli, müalicə və istirahətinin təşkili sahəsində Həmkarlar Təşkilatı tərəfindən görülən işlərdən də danışıb.

Onun sözlərinə görə, 44 günlük Vətən müharibəsində övladları şəhid olmuş mərkəz əməkdaşları, eləcə də I Qarabağ müharibəsi və Vətən müharibəsinin iştirakçılarının sosial problemlərinin həllinə Həmkarlar Təşkilatı tərəfindən hər zaman diqqətlə yanaşılır.

Daha sonra iclasda HT sədrinin müavini Bəxtiyar Xanbutov, mərkəzin baş mühəndisi Ramiz İskəndərov çıxış edərək Həmkarlar Təşkilatının gördüyü işlərdən danışıblar.