Fransalı professor RSXM-də olub

Bakıda fəaliyyət göstərən Fransa-Azərbaycan Universitetinin AMEA nəzdində Respublika Seysmoloji Xidmət Mərkəzi ilə əməkdaşlığa başlaması ilə bağlı Strasburq Universitetinin professoru Maksim Bano RSXM-də olub. Mərkəzin baş direktoru, AMEA-nın müxbir üzvü, professor Qurban Yetirmişli qonağı mərkəzdə aparılan elmi tədqiqatlar və alınmış elmi nəticələrlə tanış edib. Baş direktor Fransa-Azərbaycan Universiteti ilə RSXM arasında əməkdaşlığın hər iki tərəf üçün faydalı olduğunu qeyd edərək, tərəflər arasında memorandum imzalanmasının vacibliyini önə çəkib.

Maksim Bano Azərbaycanda aparılan seysmoloji tədqiqatların yüksək səviyyədə olduğunu deyib. Qonaq Fransa-Azərbaycan Universiteti ilə yanaşı, Strasburq Universiteti ilə RSXM-nin birgə layihələr həyata keçirilməsinin də mümkün olduğunu bildirib.

Qeyd edək ki, Fransa-Azərbaycan Universitetinin təşəbbüsü ilə bu təhsil müəssisəsində yer elmləri üzrə təhsil alan tələbələr RSXM-də təcrübə keçəcəklər. Bununla bağlı tərəflər arasında ilkin razılıq əldə olunub.