Fransa-Azərbaycan Universiteti RSXM-lə əməkdaşlığı genişləndirmək istəyir

Mayın 6-da Fransa-Azərbaycan Universitetinin (UFAZ) rəhbərliyi AMEA nəzdində Respublika Seysmoloji Xidmət Mərkəzində olub. RSXM-nin baş direktoru, AMEA-nın müxbir üzvü, professor Qurban Yetirmişli ilə görüşdə UFAZ-ın icraçı direktoru Vazeh Əsgərov, geofizika üzrə mütəxəssis, dosent Clara Jodri, UFAZ-ın araşdırma departamentinin rəhbəri və Strasburq Universitetinin Beynəlxalq İşlər üzrə prorektoru Filip Turek və UFAZ-ın Geofizika proqramı üzrə koordinatoru Elşən Abdullayev iştirak ediblər.

UFAZ-ın icraçı direktoru Vazeh Əsgərov bundan əvvəl də RSXM-də görüş olduğunu qeyd edərək bildirib ki, Fransa-Azərbaycan Universiteti RSXM-də daxil olmaqla AMEA-nın Yer Elmləri bölməsinə daxil olan institutlarla yaxından əməkdaşlıq etmək niyyətindədir.

Bu əməkdaşlıq çərçivəsində tərəflər arasında qarşılıqlı təcrübə mübadiləsi, UFAZ-ın tələbələrinin RSXM-də təcrübə keçməsi, RSXM alimlərinin UFAZ-da tədris prosesində iştirakı, eləcə də Azərbaycan və Fransa alimləri ilə tədqiqatlar aparması, birgə beynəlxalq konfransların keçirilməsi və s. məsələlər nəzərdə tutulur.

RSXM-nin baş direktoru, AMEA-nın müxbir üzvü, professor Qurban Yetirmişli RSXM-nin dünyanın bir sıra aparıcı ölkələri və universitetləri ilə yaxından əməkdaşlıq etdiyini qeyd edərək, bildirib ki, RSXM Fransa-Azərbaycan Universiteti ilə əməkdaşlığa açıqdır. Bundan əvvəlki müzakirələrdə də bəzi məsələlərə toxunuluduğunu xatırladan baş direktor əməkdaşlığın  genişləndirilməsi üçün yaxşı imkanların olduğunu diqqətə çatdırıb.

O, həmçinin ikitərəfli əməkdaşlığın istiqamətləri ilə bağlı proqramın tərtib olunması təklifini irəli sürüb. Görüşdə hazırda Azərbaycandakı seysmik monitorinq şəbəkəsinin işi, eləcə də yeni quraşdırılacaq seysmik stansiyalar barəsində də qonaqlara məlumat verilib. 

Q.Yetirmişli işğaldan azad edilmiş Qarabağda vaxtilə seysmik stansiyaların olduğunu  və onların işğal vaxtı ermənilər tərəfindən dağıdıldığını xatırladaraq, həmin ərazilərdə yeni seysmik stansiyaların da quraşdırlacağını qeyd edib.

Müzakirələrin nəticəsi olaraq UFAZ tərəfindən verilən təkliflər nəzərdən keçiriləcək və qarşıdakı perspektivdə tərəflər arasında birgə əməkdaşlığa dair memorandum imzalanması nəzərdə tutulur.

Görüşdə qarşılıqlı maraq doğuran digər məsələlərə də toxunulub. 

Qeyd edək ki, görüşdə RSXM-nin baş direktorunun elmi işlər üzrə müavini, texnika üzrə fəlsəfə doktoru, dosent Rauf Muradov, RSXM-nin elmi işlər üzrə baş direktorun müavini, fizika-riyaziyyat üzrə fəlsəfə doktoru, dosent Azay Rzayev, İnfomasiya şöbəsinin müdiri Vüsalə Rafiqqızı, RSXM-nin Beynəlxalq Əlaqələr şöbəsinin müdiri Telman Cəfərov iştirak ediblər.

 AMEA nəzdində RSXM-nin İnformasiya şöbəsi